識影聖誕燈飾 就要咁影
發布時間： 2014/12/24 13:17
最後更新： 2015/05/06 12:34
聖誕節就到喇！呢個短短嘅假期你會去邊？想同另一半甚或屋企人，出去睇燈飾應下節，但又唔知有邊度好？
今次呢個攻略就岩曬我哋呢啲日忙夜忙冇時間準備嘅人，皆因以下會介紹港九新界各區有乜聖誕燈飾好去處，總有一個地方啱你心水！
尖咀遊聖誕火車
最「大路」嘅當然係去尖沙咀海港城睇燈飾喇，今年佢就以「聖誕星城」做主題，將露天廣場變身成以紅、白、金色為主調的聖誕火車站，金光閃閃好有「土豪」feel！
火車站內更有一列長 30 米布滿星星的「聖誕火車」，車卡又放置十分之「卡娃兒」的 3 米高雪人、熊仔，絕對係影靚相嘅好地方。
行完商場，大家可以行去尖沙咀香港文化中心露天廣場進發，去露天廣場食「西北風」？當然唔係喇，係睇「閃躍維港 3D 光雕匯演」，睇下光雕可以有幾咁立體，為大家帶嚟視覺嘅震撼。
不過，大家要留意表演時間為每晚 8：30、9：00、9：30 、 10：00。
睇完 Show 仲有時間，可以搭天星小輪去 IFC，飽覽一下建築藝術裝置「JINGLE BAO」，兼且又有聖誕燈樂匯演，包你可以玩足一晚！
MK 玩自拍
尖沙咀有火車站，最旺嘅旺角就有自拍玩，今年新世紀廣場以「Selfie 自拍」做主題，開設「潮玩自拍館」，可以拍攝 1 分鐘心聲片段，除咗為家人朋友送上祝福之外，仲可以同至愛表白。
講完心聲，大家可以去朗豪坊探險，走入冰天世界同可愛又得意嘅極地動物北極熊、雪鴞、企鵝、北海獅、雪兔、北極狐齊齊玩自拍呢！
漫遊沙田迷宮
唔想去尖咀、旺角同人迫，沙田都有好去處，就係新城市廣場的「星夜迷宮@星光花園」。
當中仲有全港首個「聖誕透明迷宮」，迷宮佔地 8,000 呎，由逾 400 塊透明幕牆組成；迷宮的間隔更可作 3 款深淺程度的移動，令大家每次入去都有另一番新感受。
入青衣搵 Frozen
為人父母嘅你，若然有個小公主，就不得不去以《魔雪奇緣》作聖誕主題既青衣城。
除左有安娜公主同愛莎女皇同你嘅寶貝囡囡影相之外，仲有電影場景包括：8 米高的冰雪城堡、北歐小鎮等一齊搬到商場。
當中有發出特別魔雪效果的神奇宮殿，又有可以讓囡囡穿上戲服嘅魔雪奇緣照相館，以及 Pop-up 精品屋，相信你嘅小公主一定玩到唔捨得走！
假如你個係小王子的話，不妨去奧海城等 Playmobil 公仔陪你過聖誕。
係呢個「Playmobil 聖誕小鎮」入面，有齊聖誕大屋、聖誕市集，同埋 5 米高嘅聖誕樹，再加上一大埋 Playmobil 公仔，相信囝囝都一樣玩得好開心。
迪士尼迎聖誕
想一家大細盡興一點，咁就要走入迪士尼公園，因為有愛莎女皇、安娜公主、迪士尼小熊 Duffy 和小熊朋友 ShellieMay，係園區內同大家合照；又或者走上美國小鎮大街，望望色彩變化多端既幻彩聖誕樹。
再加上好玩刺激既機動遊戲，以及精彩的煙花匯演，相信大人細路都一定玩得開心！
原文刊於：ezone.hk，原題為「行勻港九新界 聖誕燈飾 5 大攝友好去處」。
相片來源：ezone.hk
